نزال يا يسوع
بقلم غادة المر
نزال يا يسوع عن صليبك وحمل معي صليبي
اليوم الجمعة العظيمة والدّني كلها سكوت.
من أول ما وعيت عالدّني وأنا بحبّك، بحبّك عطريقتي.
يمكن مش متلن، يمكن ما كتير بروح عالكنيسة ولا كلّ ساعة حاملي المسبحة وعمصلي،،،
لاني بس اشتقلك بغمّض عيوني وبشوفك. بحسّك معي ولا لحظة بتفارقني.
بحس بس كون زعلاني بتوشوشني وفجأة بروح كل ّزعلي وهمّي
وبس كون مبسوطة، بشوفك بكل ّ ضحكة وبعيون وفرح كل ّ الي حوالييّ.
بسمع صوتك بصوت كل ّ إنسان موجوع وعميصرخ يا ربّي
وبشوفك بعيون كل ّ النّاس الموجوعة والمظلومة بهالدّني .
اليوم بالذات جيت أحكيك..
وعيت بكير والدّني بعدا نايمي، جيت ركعت قدام صورتك..
تقلّك أنو وطني موجوع ومنهوب ومذلول ..
تقلك أنو الحزن والدّمع والوجع صار مش مقبول ..
وتقلك الدّني كلها صارت موجوعة ومحبوسة، والناس محجورة ومخباية ومرعوبة،والموت فلتان بكل ّ الدّني.
تقلك بكفي خلص طلّ.. وينك ؟؟؟
رحأركع قدام جروحاتك وعذاباتك عالصّليب، وقلك أنو درب الآلام عمنعيشها كل ّ يوم.
جاي قلك نزال .. الشّر فلتان عمبيبرم و يفتك بهالدّني.
أنت رافقتني كل ّ حياتي، وبتعرف كل ّ شي عنّي، ومشيت معي درب كلّها شوك ووجع ودموع وكانت صعبة وما كانت هيني.
كنت بس أوجع… أطّلع فيك تا أرتاح
كنت بس خاف… أخد القوّة منّك
كنت بس إفرح… شوف الدّني بعيونك
كنت بس غلّط… أطلب منّك تسامحني
وكنت بس أضعف… صلي تتقويني
اليوم زاد الحمل كتير، اليوم يا يسوع أنا موجوعة وخايفة وحزينة وفرحاني وخاطية وضعيفة.
اليوم قلبي حامل وجع وحزن وخطايا وخوف وفرح وذنوب كل ّ النّاس الي حواليّي.
تقل كتير الحمل علييّ، وخوفي عكل ّ الي بحبهن عميقتلني .
اليوم بدّي قلك تمشي معي كتير خايفي
اليوم اليوم بدي تكون حدّي وتقويني
اليوم بدّي عاتبك وصرّخ وقلك شو ناطر ؟؟؟
نزال دخيل إجريك ما بقى الأرض تساع شر ّ وظلم وحزن ودموع وخوف وقهر وحروب ومرض ووباء وفساد، وطريق الجلجلة كل يوم عمنمشيها.
نزال، عبالي حط ّ راسي عكتفك وأشكيلك همّي وبأيديك المقدّسة تمسح دموعي وخوفي. وهمّي.
نزال ناطرينك بعد ٣ أيام، نعيش معك فرح لقيامة.
نزال صارت الدّني غروب وأنهر وجع وحزن ودموع
نزال خليك حدّي كتير تعبت وما قادرة بقى كفّي، قلبي
بردان وكتير موجوع والحزن صار دروب، والدني كيف بدها هيك تكفّي ؟؟؟
نزال عن صليبك وحمول معي صليبي.