الأحد بجبل لبنان… يوم الخيار الحقيقي

في قلب كل بلدة، في كل حي، ينبض اليوم أمل جديد. انتخابات بلدية عم تبدأ من جبل لبنان، والأحد هو اليوم المفصلي. يوم الناس، يوم القرار، يوم المسؤولية المشتركة.

الملفت هالسنة إنو كل لايحة تقريبًا صار عندها برنامج واضح. صار في ناس عم تشتغل على الرؤية، على الحلول، على مشاريع إنمائية فعلية مش بس شعارات. الشباب والصبايا مشاركين بقوة، مش بس بالحضور، بل بالتخطيط والتنظيم والقيادة. وفي ناس عندها خبرات كبيرة عم تكمّل هالمسيرة بعقل وحكمة.

هيدا الشي ما بيصير كل يوم، وهون بيجي دور كل فرد منّا.

الصوت مش بس ورقة بصندوق، الصوت هو المساهمة بتحديد شكل الحياة اليومية بالبلدة يلي منعيش فيها، من نضافة الشارع، لإدارة المشاريع، لتنظيم العمل المحلي والخدمات الأساسية.

عم نعيش فرصة، ويمكن تكون من أهم الفرص يلي مرقت علينا.

الفرصة إنو نختار التغيير بإيدينا. مش بالمقاطعة، ولا بالانتقاد، بل بالمشاركة الواعية، وباختيار اللايحة يلي بتمثل قيمنا، طموحنا، ورؤيتنا للمنطقة يلي منحبها.

ما في شيء بيمنعك تنزل تنتخب، إلا إذا اخترت تتنازل عن دورك.
وما في أقوى من صوت نابع من قناعة.

الأحد مش نهار عادي، هو بداية مسار جديد.
نحنا قدّا، وشبابنا جاهز، وبرامج عم تترجم على الأرض.
خلونا نكون على قد الوعي، ونخلق سوا فرق بيشبهنا وبيشبه مستقبل ولادنا.

جبل لبنان رح يكون أول خطوة،
وكل لبنان رح ينتخب بوعي وثبات .