المسلول خالد بن الوريد بن طلال المرعبي سيف الدعش بمواجهة أبو مروان في بلجيكا

حادثه حقيقيه جداً مؤرشفه على صفحتي بالفايسبوك في مثل هذا اليوم لسنوات مضت حيث التقيت بمحض الصدفه بالصحابي المسلول سيف الله خالد بن الوريد الى الوريد بقسم جوازات السفر بدائرة الهجره ببلجيكا ! كيف ؟ تفضلوا نقرأ على فنجان قهوه .

مبارح كنت عم جدّد بسبوري بدائرة الجوازات بالبلديه يلي ساكن فيها ، ولمن عرفت المديرة والظابطه البلجيكيه المدبّرة لشؤون الدائرة السيده شانتال فان دن براندن انو أصولي لبنانيه عربيه وتعود لهمدان اليمن طلبت مني بكل فخر واحترام أن اساعدها في ترجمة لشي عجيب عامل عندهم اشكال ولغط مع بعض اللاجئين العرب الذين صدف وجودهم لحظتها وهو رجل مُسجَل تحت اسم “خالد بن الوليد ” لانو ما عم تفهم عليه كونه من ليبيا ولا يتكلم الا ليبي ( حرفياً قالت ليبي مش عربي ) ، وقد حاولت المساعده بأن أُترجم على قدر ما استطعت اليه سلسبيلا .

إعتقد هذا الرجل ( المنتحل لاسم خالد بن الوليد بن طلال المرعبي ) إني سوري الجنسية وانتمي للمعارضه السوريه وصار يحكيلي عن بطولاته في حرب داعش والنصره ومعارك داعش والغبراء ضد سوريا والشعب السوري ومبين عليه بوضوح انه محتال دُولي فناص ودجّال تاريخي محترف…

فسألته : كيف ممكن يكون اسمك الحقيقي هيك خالد بن الوليد يا غلام ؟!.

فأجاب بإعتزاز وفخر ان جد جد جد جد جد جدّه لاجداده كان قد حارب مع خالد بن الوليد تحت قيادة النبي محمد ( ص ) بمعركة ” أُحُدْ ” وقد اصيب اصابة طفيفه بعد ان جندل آلاف الكفار بسيفه المسلول عن جنب وطرف !.

قلتلو يا رجل انت او تشذاب وكذاب او ملتبس وغلطان كتير .

قال : لا ابداً ابداً وعندي وثائق موجوده في بيوت أجدادي كإثباتات لا تقبل الشك بهذا ابداً ..

قلتلو يا رجل صلي عالمصطفى وروق علينا الله يهديك ، لأنه في تلك المرحله ( معركة أُحُد ) خالد بن الوليد كان ما زال يحارب في طليعة الكفار ضد النبي محمد ص وهالشي حقيقي ومعروف للجميع وموثّق ومُثْبَت تاريخياً ومدعوم بالشواهد…

قام انسطل وفكر وحك براسو وقال : ليش أنت مين فكرت المقصود بإسمي خالد بن الوليد ؟

قلتلو ما غيرو سيف الله المسلول بالربيع العربي عالعباد العرب والشعب السوري حالياً ، ما انت هيك قلت سمّوك عإسمو جدك اللّزم دخيل إسمو واسمك هيك مكتوب بالوثيقه البلجيكيه يلي ترجمتلك اياها وحاملها بين ايديك ، ليك ولاه لا تجدبها علينا هلق بهالحشره !.

أجابني حرفياً : لا حبيبي… المقصود بخالد الذي أحمل إسمه هو سمو الملياردير السعودي المبجّل الأمير خالد بن الوليد بن طلال المدّاح المرعبي سلام الله عليه تبع برج العرب و روتانا ، وبعدين أنت ليش مستقل فيه ؟ هيدا الرجل مجاهد وبطل بعدين مش أنت حضرتك بتكون عمار مروه سليل الصحابي عمار بن ياسر ؟

قلتلو : له ياعمي أنا عمار مروه أبو مروان بن أبي طالب أخ الفنان اللبناني ياسر مروه تبع محترف بريق الزيت يلي بمثّل بمسرحية الأخ ربيع مروه سيف المسرح الحديث المسلول بالحداثه . والمسرحية معروفه بإسم ” أمتطي غيمه “.

قام صفن شوي وقلي مش خيك بيشحن زيت سيارات وكعك وبامبرز وحليب تاترا ونيدو للثوار عليبيا وجنوب شرق صحراء كالاهاري في بلاد ما بين نهرين الميسيسبي والميسوري يلي بيقسم نهر العاصي بمجرى دلتا نهر النيل ؟

قلتلوا له له له خيي ياسر بمثّل بمسرح الدُمى بكرم زيت الزيتون يلي عالصالومي بصحراء عرب وادي خالد بجبال البطم يلي عالسمرموره حد السمرلنك جنب بيت زيكو .

تعجب كتير وسألني بلهجة تحقيق بشرفك قلّي بلا لف ودوران انت مين تحديداً ؟

قلتلو انا الهمداني عمار ابن أبو عمار مروه وِلْدْ عم ياسر عرفات حجازي مذيع بتلفزيون لبنان والمشرق تبع شريف الأخوي يلي كانوا يعملوا النشره الاخباريه والجويه بأحداث حوادث اللبنانيه تبع لبنان الجديد يلي طلع لحم بعجين…

قام أخو الشحطه تأثر كتير وعمل حالو فهم وانبسط كتير وضحك ضحكه بريئه كتير كلها معاني وعمل حالو أنو هو حمار صدقني وصار يسألني شو أخبار سمير يزبك وعصام رجي وسميره توفيق الباشا وسيمون أسمر والمفتش وحيد جلال الدين يَكَن وبرنامج حول غرفتي لعبد المجيد نصور ونزهه يونس وعكرمة بن نافع مراد وقال هو معجب كتير بتمثيل حنان الحج ابو علي اليحفوفي وسألني بإلحاح إذا عن جد حنان تجوزت بالممثل ايلي صنيفر ؟ وليش مار شربل عم يعمل معجزات كتير ومار رفقا ما عم تشتغل وحردانه مع الحرديني بلا معجزات ؟.

وقال إنو هوي مدمن على مشاهدة أفلام عبد الحليب نيدو وهند رستم غزالي ، وبحب أغنية غزالي شارد بالبلد للصبّوحه منى مرعشلي وسألني عن بطرس غالي إذا بعدو لحالو بجيش لبنان العربي تبع عزيز الأحدب وليش ما إنضم لسيادة اللواء مصباح الأحدب ، بحي اللجى ومصباح الأحدب شو بيقربو لأحدب نوتردام وكمان بدو يعرف ليش الصبّوحه صباح تركت رشدي اباظه تحديداً ، وحسيت إنو بعد شوي رح ينط من مصباح الأحدب لمصباح علاء الدين عأساس بطرابلس ما في كهربا والمصباح ضروري كتير هونيك…

بس أنا تصرصع راسي وصرت عم فكر انو الله يساعدنا المره اللوخره بعد سنتين بس بدي جدد البسبور ليقوم يطلعلي عمرو بن العاص أو سعد بن أبي رقّاص أو السموأل أو الزمخشري وعنترة بن شداد وجايب معو شيبوب وعبله وساعتها لازم أعرف شو لازم أفتي بالشعر الجاهلي خصوصاً إني مع الشعر الحديس !

فرجعت فورتياً عند الضابطه البلجيكيه الست شانتال هانم وطلبت منها أن تجدد لي البسبور لعشر سنين ومش سنتين ودفعت المبلغ المرقوم وكلو من تحت رأس سيف الله المسلول الصحابي خالد من الوريد للوريد بن طلال المرعبي وكلها تشابه أسماء مقصوده لعلكم تفقهون المغزى من خلف القصد أو بالأحرى تفكهون لأن الفاكهة برمضان أطيب بكثير .

دفع الله ما كان أعظم وسامحونا طولنا عليكم ! .

بقلم : ابو مروان مروه البلجيكي.