بطلّع على بيروت…

بطلّع على بيروت…
بشوف غيم ملبّد رمادو…
ودخان عم ياكل… حكي البيوت،
ومواج… هشلانه… عرايا… خُوت،
لبنان… يوما… ضيّع ولادو…
ما أصعب… ل بيموت،
وما بيعرف مين جلّادو…

بطلّع على البكرا…
بشوف شقع الخوف صار… جبال،
والدرب لا فكره… ولا سَكره،
وخيّال هاك السيف صار خيال…
وساحاتنا… ما عاد فيها رجال…

بطلّع على لبنان،
بشوف صبح مبشنق بأسود،
يجنّ الحلم… من كترة الحرمان،
يردّ الوجع… ما عاد في أزود…
لكن… على المينا بقي إنسان،
مليان قلبو من رجا الإيمان…
بجود الحياة… بيطلع الأجود.

يا أربعه من آب، يا سرساب،
يا خيبة النار… بقلب ما تاب،
درّى القمح… قفّه ورا قفّه،
ونص المدينه… انهدّ صار تراب…
لكن مَ خلصت رقصة الزفّه…
في ندر… خلف بواب… فوق عتاب،
بليل البرد… في إيد بتدفّي…
وجندي بطل… صَدّ بطريق دياب،
بيبقى… الأنقى، من صلا الكتاب،
حامل بقلبو الأربعه… من آب…
يطوي الوقت… والموت… ويكفّي…